Jólin eru komin í Ikea! Auglýsingarnar eru byrjaðar að dynja á okkur neytendum, raunar byrjuðu þær fyrir mörgum vikum síðan, í október. Fremst í flokki voru Húsasmiðjan, Blómaval og auðvitað Ikea, en núna eru flestir að hefja baráttuna. Baráttuna um hylli okkar, um tíma okkar, hugarrúm og frið. Núna verður allt reynt til þess að neytendur seilist ofan í budduna og kaupi, oft hluti sem enginn þörf er fyrir og eru oftar en ekki afar skaðlegir og óumhverfisvænir. Já, við erum að kaupa lífið frá okkur. Með hverjum hlut sem við eignumst að óþörfu þá leggjum við aðeins meira í að eyðileggja jörðina og lífið á henni.

Á tímum einnota umbúða, rafmagnstækja sem endast í nokkur ár og fara svo á haugana, á tímum óendurvinnalegra plastleikfanga, þá höfum við möguleikann á að staldra við og hugsa hvað peningarnir, vinnan og tíminn eru að fara í. Er mikilvægara að kaupa nýjan gsm-síma en að eiga frítíma með sjálfum sér, vinum eða fjölskyldu? Þegar við eyðum peningum erum við jafnframt að eyða frítíma okkar, frítíma sem upprunalega fór í vinnu.

Þurfum við allt sem keypt er? Gera þessir hlutir okkur hamingjusöm eða er hægt að sleppa kaupæðinu, kaupa aðeins það nauðsynlegasta? Finnast friður og hamingja annarsstaðar að, frá fjölskyldu, að innan, frá vinum og samfélaginu í kring?

Það er alltaf erfitt að byrja, það er erfitt að skera sig úr fjöldanum. Hversvegna ættum við að kaupa minna á meðan aðrir halda áfram neysluæði sínu út í hið óendanlega?

Til þess byrjaði Kaupum ekkert dagurinn.

Kaupum ekkert dagurinn er haldinn ár hvert –
til þess að slíta okkur úr fíkn neyslunar,
til þess að gefa jörðinni tækifæri á því að anda,
til þess að skapa meðvitund um hvað það er sem við kaupum.

Kaupum ekkert dagurinn er ekki til þess að breyta öllum í fábrotna munka og nunnur sem neyta aðeins þess sem þarf til að lifa af. Öðru nær, hann er til þess að við gerum okkur grein fyrir því hvað það er sem við kaupum. Það er ekki það sama að kaupa hamborgara frá McDonald’s eða frá Nonnabita, það er ekki eins að kaupa kók eða lífrænt kóla, það er ekki eins að kaupa Merrild-kaffi og að kaupa fair trade-kaffi. Allt sem við gerum skiptir máli, gríðarlegu máli, og kaupum ekkert dagurinn á að minna okkur á þá staðreynd. Það viljafæst stórfyrirtæki að við gerum.

Kaupum ekkert laugardaginn 24. nóvember 2007!
Sjá nánar: www.adbusters.org

Ummæli (0)

Skrifa ummæli